-

كتابنا

تاريخ النشر - 14-09-2020 11:37 PM     عدد المشاهدات 636    | عدد التعليقات 0

والله العظيم .. هبلتونا

الهاشمية نيوز - والله العظيم.. هبلتونا
كتب :جهاد ابو بيدر
وصلت لدرجة لم اعد استوعب ما يجري في البلد.. ولم اعد استوعب ان كان هؤلاء في السلطة التنفيذية قادرين او مؤتمنين فعليا على حياتنا.. والشئ الوحيد الذي استوعبته مؤخرا ان البلد "سارحة والرب راعيها" ولولا ان من بيننا من صدق ايمانه ويدعو لنا ليل نهار لحدث ما لا يحمد عقباه..
هبلتونا.. وهلكتونا.. وجننتونا.. ولدرجة الواحد صار يحكي مع نفسه اوصلتونا.. واحد منكم بحكي وصلنا الانتشار المجتمعي للوباء برد عليه الثاني بعد ساعة وبحكي لا لسه ما وصلنا.. طيب انا امشي ورا مين؟
سكرتوا ٤٠٠٠ منشأة اقتصادية بحجة مخالفة امر الدفاع لانه معظم موظفي هاي المنشآت كانوا حاطينها ع الثم مش على الأنف وكل يوم بتطالبوا المواطن يلبس كمامة ويلبس كفوف.. بس لما يشوف وزرائه بزوروا بعض وبلتقَوا مع بعض وبسلموا ع بعض ومش لابسين لا كمامات ولا كفوف بصير يضرب حاله كفوف
فتحتوا المدارس ورح تفتح الجامعات وكل يوم بتسكروا مدرسة او صف ولساتكم بتحكوا الامور تحت السيطرة.. يعني شو بتستنوا ينتشر الوباء بين الاطفال "وهات قطبها بعدين"
بتحكولنا بدنا نتعايش مع الوباء لانه الواضح مطولة بس بنفس الوقت بتكذبوا علينا وبتحكوا ما رح نلجأ لمناعة القطيع.. بالله كيف يعني رح نتعايش... نترجاه مثلا للفيروس يقعد عاقل.. ولا نحكيله اوعك تقرب خليك بعيد.. فهمونا كيف يعني نتعايش وشو فكرة التعايش
اطباء وممرضين وكوادر طبية ورغم كل اجراءات الحظر صابهم الفيروس وبمستشفى البشير اللي المفروض كل احراءات السلامة فيه شفنا اكم اصابة كيف عاد بدك تقنعي ازور المستشفيات واروح اتعالج من المغص او اعمل عملية اذا هيك الوضع بمستشفى
لا متفقين ع قرار وكل يوم بتطلعولنا بقصة تلهونا فيها لما هبلتونا.. تحملنا انه كنا الكم فأر تجارب ستة أشهر مرة كسرنا منحنى الوباء ومرة لازم تزيد الحالات وترد تنزل عشان نكير ونسطح منحنى الوباء.. ول ما النية كسرناه وسطحناه ولعننا امه على عزا ابوه للوباء.. شو اللي صار؟
طيب معلش شو نعمل.. التاجر مثلا عادي يستورد ولا ما يستورد؟ اولادنا رح يضلوا ع مقاعد الدراسة ولا رح ندرسهم عن بعد؟ القطاعات رح تضل فاتحة ولا رح ترجع تسكر؟
انتخابات نقابات اجلتوها وبدكم تعملوا انتخابات نيابية..وبالمقابل ايام الحظر بالزرقا وعمان سمحتوا لعشائر بالمحافظات تعمل انتخابات! والله هبلتونا
حقنا نعرف! مين تحاسب ع هيك خربطة او مين رح يتحاسب؟ ولا هلا صرنا عندكم احنا جزء من العالم واللي بصير عليهم بصير علينا... ما كان من الاول لويش عملتوا اللي عملتوه جربتَوا فينا كل افكار امم لا اله الا الله.. تجربة تجربة ويا ريت فلحتوا.. حجر منزلي ولا بحر ميت.. حجر اسبوع ولا ١٤ اليوم حسستونا انها "منيو" بمطعم ولازم نختار
هذا وطن مش "لائحة طعام" واحنا بشر مش فئران تجارب.. بكفي هبلتونا

جهاد ابو بيدر



تعليقات القراء

لا يوجد تعليقات


أضـف تعلـيق

تنويه :
تتم مراجعة كافة التعليقات ،وتنشر في حال الموافقة عليها فقط.
ويحتفظ موقع وكالة الهاشمية الإخبارية بحق حذف أي تعليق في أي وقت ،ولأي سبب كان،ولن ينشر أي تعليق يتضمن اساءة أوخروجا عن الموضوع المطروح ،او ان يتضمن اسماء اية شخصيات او يتناول اثارة للنعرات الطائفية والمذهبية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار موقع وكالة الهاشمية الإخبارية علما ان التعليقات تعبر عن أصحابها فقط ولا تعبر عن رأي الموقع والقائمين عليه.
الاسم :
البريد الالكتروني :
اظهار البريد الالكتروني
التعليق :
رمز التحقق : تحديث الرمز
أكتب الرمز :

عـاجـل :